KÍO dagurinn var haldinn síðastliðinn fimmtudag og komu þar um 200 konur saman til að ræða jafnrétti, framtíð orkumála og hlutverk kvenna í atvinnulífinu.

Dagurinn var jafnframt hátíðlegur, þar sem félagið fagnar tíu ára afmæli sínu í ár. Á þeim tíma hefur það orðið öflugur vettvangur fyrir konur í orkugeiranum og haft jákvæð áhrif á þróun jafnréttismála, þó enn sé verk að vinna.

Á dagskránni voru fjölbreytt erindi og umræður þar sem meðal annars var fjallað um mikilvægi samvinnu, hugrekkis og markvissra aðgerða til að auka þátttöku kvenna, sérstaklega í sérfræðistörfum og leiðtogahlutverkum. Þá var einnig farið yfir nýjar tölur um stöðu kynjanna í geiranum sem sýna að markviss vinna skilar árangri, meðal annars í framkvæmdastjórnum stærstu orku- og veitufyrirtækja landsins.

Skilaboð dagsins voru skýr

• Jafnrétti gerist ekki af sjálfu sér

• Það krefst markvissra aðgerða og samstillts átaks

• Það er jafnframt lykilforsenda fyrir árangri, nýsköpun og samkeppnishæfni til framtíðar

KÍO dagurinn í myndum

Orkumesti viðburður ársins

Ráðstefna á Edition eftir hádegi og skemmtun á Kjarval fram eftir kvöldi!

KÍO stendur fyrir risa viðburði 19. mars á Edition!

Húsið opnar kl. 13. Við hefjum spennandi dagskrá stundvíslega kl. 13:15, þar sem fram koma frábærir fyrirlesarar og gestir í sófann.  

Búðu þig undir spennandi dag, listi yfir fyrirlesara verður birtur á næstu dögum. 
Við færum okkur svo saman yfir á Kjarval í stuð og stemmningu, veitingar og drykki! 

Miðaverð:

Allur dagurinn & kvöldið – 13.500 kr.
Aðeins ráðstefna – 10.500 kr. 

👉Skráning á KÍO daginn

Boðað er til aðalfundar Kvenna í orkumálum, miðvikudaginn 4.mars kl 12:00 til 13:30.

Fundurinn er mikilvægur vettvangur til að fara yfir stöðu mála og ræða framtíð félagsins.

Á fundinum mun fara fram kjör til stjórnar fyrir starfsárin 2026 til 2028 og framboðsfrestur rennur út á miðnætti 28. febrúar.

Stjórnarseta er frábært tækifæri til að hafa áhrif á þróun orkugeirans, efla sýnileika og stöðu

Við hvetjum allt félagsfólk til að gefa kost á sér, kosið er í öll sæti.

Fundurinn fer fram á Teams.

Dagskrá aðalfundar samkvæmt samþykktum:

1. Kosning fundarstjóra og fundarritara
2. Skýrsla stjórnar lögð fram
3. Reikningar lagðir fram til samþykktar
4. Breytingar á samþykktum félagsins (ef einhverjar)
5. Ákvörðun félagsgjalds
6. Kosning stjórnar
7. Kosning skoðunarmanns
8. Önnur mál

Tillögur að lagabreytingum skal senda á konuriorkumalum@gmail.com eigi síðar en 27. febrúar.

👉 Skráning á aðalfund 2026 / Registration for the Annual General Meeting 2026

👉Framboð til stjórnar KÍO / Board nominations Women in Energy

Framundan er fullt af spennandi viðburðum sem gefa okkur tækifæri til að kynnast betur, læra og efla tengslanetið.

Við hvetjum ykkur sérstaklega til að merkja fimmtudaginn 19. mars í dagatalið, frá hádegi og fram eftir kvöldi. Þann dag höldum við KÍO daginn hátíðlegan og 10 ára afmæli KÍO.

Okkur í stjórn KíO finnst mikilvægt að lyfta orkukonum upp og að stuðla að því að fleiri konur sjái sér framtíð í orkugeiranum.

Í vetur höfum við nýtt samfélagsmiðla, LinkedIn, Instagram og Facebook, til að kynna fjölbreyttan hóp kvenna sem eiga það sameiginlegt að starfa í orkugeiranum eða tengdum greinum. Þar koma fram konur úr öllum áttum, fagkonur í iðngreinum, konur í tæknistörfum og verkfræði, konur í rannsóknum og nýsköpun, í þjónustustörfum, verkefnastjórnun og fjármálum, auk fjölmargra annarra starfa sem endurspegla víðfeðman og lifandi geira.

Við vinnu í þessu verkefni höfum við gert okkur grein fyrir því hversu fjölbreytt tækifærin í orkugeiranum raunverulega eru og vonum að aukinn sýnileiki hvetji enn fleiri konur til að íhuga starfsvettvang í honum. Við vonum líka að verkefnið styrki tengsl og samfélag þeirra kvenna sem starfa þar nú þegar.

Fylgdu Konum í orkumálum á LinkedIn, Instagram og Facebook til að sjá allar sögurnar og kynnast enn fleiri konum í geiranum.

Boðað er til aðalfundar Kvenna í orkumálum fimmtudaginn 5. júní kl. 15:30 til 16:00.

Fundurinn er mikilvægur vettvangur til að fara yfir stöðu mála og ræða framtíðarsýn.
Stjórnin var í fyrra kosin til tveggja ára og því ekki um kosningar að ræða í ár.

Fundurinn fer fram í Höfuðstöðinni, Rafstöðvarvegi 1a.

Við ætlum að slá upp sumargleði í leiðinni, með tengslamyndun, tónlist og gleði.
Við vonumst til að sjá sem flest félagsfólk!

👉 Skráning á aðalfund og sumargleði

Aðalfundur kl. 15:30 – 16:00

Dagskrá aðalfundar samkvæmt samþykktum:

1. Kosning fundarstjóra og fundarritara
2. Skýrsla stjórnar lögð fram
3. Reikningar lagðir fram til samþykktar
4. Breytingar á samþykktum félagsins (ef einhverjar)
5. Ákvörðun félagsgjalds
6. Kosning skoðunarmanns
7. Önnur mál

Tillögur að lagabreytingum skal senda á konuriorkumalum@gmail.com eigi síðar en 1. júní.

🍸Sumargleði kl. 16:00 – 17:00

Að loknum fundi verður boðið upp á léttar veitingar og drykki í fallegu og skapandi umhverfi Höfuðstöðvarinnar.

Við notum tækifærið til að tengjast, spjalla og fagna sumrinu saman.

🎶Tónleikar á torginu kl. 17:00

Um kl 17 röltum við saman niður á torgið við Elliðaárstöð þar sem Veitur halda nýsköpunarfestival og bjóða til tónlistarveislu.

Þar stíga á stokk Herra Hnetusmjör, Una Torfa og Dj. Dóra Júlía

Nú styttist í KÍO daginn og við getum ekki beðið eftir að taka á móti ykkur fimmtudaginn 3. apríl í Fantasíusalnum á Vinnustofu Kjarvals – sjá mynd fyrir neðan.

Skráningarfrestur er liðinn og fullbókað er á árshátíðina – hjartanlegar þakkir fyrir einstakar viðtökur!

Dagskráin er þéttskipuð og full af krafti, samveru og innblæstri:

• 13:30 – Setning og ávarp frá stjórn KÍO
  • Opnunarávarp – Jóhann Páll Jóhannsson, Umhverfis-, orku- og loftslagsráðherra
  • Orkugeirinn heillar – Ragna Árnadóttir, verðandi forstjóri Landsnets
  • Framkoma og stjórnendaþjálfun – Andrés Jónsson og Þórhallur Gunnarsson, ráðgjafar
• 15:15 – Kaffi og tengslamyndun
  • Hvað er svona merkilegt við það? – Anna Signý Guðbjörnsdóttir, framkvæmdastjóri Kolibri
  • Hvernig kemst ég í stjórn fyrirtækis? – Ingunn Agnes Kro, stjórnarformaður RARIK
  • Að vera rétt manneskja á réttum tíma – Guðný Helga Herbertsdóttir, forstjóri VÍS
  • Mildilegt roast á orkugeirann – Komið gott pod
• 17:15 – Fordrykkur í Landsbankanum
  • Örerindi um fjárhagslega heilsu – Eyrún Anna Einarsdóttir, Framkvæmdastjóri Eignastýringar og miðlunar
• 18:20 – Rölt yfir á Kjarval í mat og drykk
  • Ilmupplifun í boði Fischersund
  • Uppistand með Snjólaugu Lúðvíksdóttur
  • Dans fram eftir kvöldi með DJ Dóru Júlíu

Glæsileg dagskrá með öflugum þátttakendum

Hvar er inngangurinn?

Gengið er inn hægra megin við Vínbúðina:

⚡️ Niðurstöður fjórðu könnunar Kvenna í orkumálum um líðan starfsfólks og stöðu jafnréttismála ⚡️

Könnunin var framkvæmd af Prósent og styrkt af RARIK, sem við þökkum kærlega fyrir stuðninginn. Gögnum var safnað frá maí til ágúst 2024 og gefa niðurstöður mikilvægar upplýsingar um upplifun starfsfólks, stöðu jafnréttismála og möguleika til úrbóta í geiranum.

Könnunin var send á 12 stærstu orku- og veitufyrirtæki landsins, og svöruðu alls 987 einstaklingar, sem jafngildir 59% svarhlutfalli. Ekki bárust næg svör frá þeim sem skilgreina sig utan kynjatvíhyggju og því er ekki hægt að birta niðurstöður fyrir þann hóp.

Helstu niðurstöður

• Starfsánægja er almennt há.
• Sveigjanlegur vinnutími virðist vera að aukast meðal starfsfólks.
• Hár starfsaldur og hátt menntunarstig einkenna orkugeirann.
• Konur upplifa almennt meiri hvatningu og tækifæri til starfsþróunar en karlar. Þessi munur hverfur eftir 55 ára aldur.
• 27% starfsfólks hefur orðið fyrir einhvers konar misrétti, svo sem að vera haft útundan, hunsað í faglegu samhengi eða að annað starfsfólk hafi fengið hrós fyrir þeirra vinnu.
• Konur verða frekar fyrir misrétti en karlar, en tilfellum hefur fækkað á milli kannanna.
• 8% starfsfólks segist hafa orðið fyrir einelti, kynbundinni eða kynferðislegri áreitni.
• Hlutfall starfsfólks sem telur fyrirtæki sitt vinna markvisst að jafnréttismálum hefur lækkað lítillega frá síðustu könnun.
• 8 af 10 vita hvert þau eiga að leita innan fyrirtækisins ef neikvæð atvik koma upp. Engin breyting hefur orðið á þessu milli ára sem bendir til tækifæra til úrbóta.
• 27% treysta ekki nægilega þeim sem taka við upplýsingum um neikvæð atvik né ferlinu sem fylgir í kjölfarið.
• Konur taka að meðaltali 10 mánuði í fæðingarorlof á móti 3 mánuðum hjá körlum.

Hér er hægt er að skoða helstu niðurstöður könnunarinnar og bera þær saman við niðurstöður frá 2021 og 2022.

Í niðurstöðum kemur fram að enn eru tækifæri til staðar til að bæta vinnuumhverfið, sérstaklega þegar kemur að trausti á ferlum sem snúa að meðhöndlun neikvæðra atvika og jafnréttisstarfi innan fyrirtækja.

Við vonum að niðurstöðurnar verði nýttar til að skapa enn betra vinnuumhverfi fyrir öll í orku- og veitugeiranum.