Á næstu dögum verður ný könnun um líðan starfsfólks í orku- og veitugeiranum send út. Könnunin er send á allt starfsfólk tólf stærstu orku- og veitufyrirtækja landsins. Könnunin er liður í því að kanna stöðu jafnréttismála innan fyrirtækjanna og opna á samtal um framtíðarsýn öllum kynjum til hagsbóta.

Konur í orkumálum hafa staðið fyrir tveimur könnunum um líðan kvenna í geiranum sem hafa gefið mikilvæga innsýn í upplifun kvenna á starfsumhverfi sínu. Sú nýjung er á könnuninni í ár að félagið leggur könnunina fyrir öll kyn.

Könnunin er framkvæmd af Prósent sem framkvæmdi jafnframt eldri kannanirnar og er gert ráð fyrir að hún standa yfir í tvær vikur. Niðurstöðurnar verða síðan kynntar á viðburði KÍO sem verður auglýstur síðar.

Markmið þessa mælinga er að fá fram viðhorf og skoðun sem flestra og skapa þannig tækifæri til áhrifa og umbóta í okkar starfsumhverfi. Góð þátttaka allra sem fá könnunina senda skiptir því máli fyrir málstað félagsins sem er að stuðla að jafnrétti og auka áhrif kvenna innan orku- og veitugeirans.

Fullt var út úr dyrum á sameiginlegum fundi KÍO og FUMÍ á Hilton Reykjavík Nordica þann 14. október sem bar yfirskriftina Orkumál eru umhverfismál: Sameiginleg markmið, samtal og samvinna.

Í upphafi fundar fluttu Halldór Þorgeirsson, formaður Loftslagsráðs og Alma Stefánsdóttir starfsmaður Landsvirkjunar og félagi í Ungum umhverfissinnum stuttar framsögur til að ýta umræðunum úr vör en að því loknu hófst pallborð undir stjórn Aðalheiðar Snæbjarnardóttur, sjálfbærnistjóra Landsbankans.

Líkt og titill fundarins gaf til kynna var markmiðið að ræða þar skörun orkumála og umhverfismála og voru umræður þeirra Halldórs Þorgeirssonar, Auðar Önnu Magnúsdóttur framkvæmdastjóra Landverndar, Sigrúnar Sayeh frá Ungum umhverfissinnum, Kristínar Lindu Árnadóttur aðstoðarforstjóra Landsvirkjunar og Ketils Sigurjónssonar framkvæmdastjóra Zephyr Iceland líflegar og áhugaverðar.

Þau voru öllu sammála um að orkumál og umhverfismál væru einn og sami hluturinn og að grípa þyrfti til umfangsmikilla aðgerða í loftslagsmálum, þó að skiptar skoðanir væru um aðgerðirnar sjálfar. Fyrst og fremst þyrftu umræður um mögulegar aðgerðir og sviðsmyndir að vera heiðarlegar þannig að almenningur sé meðvitaður um hvað felst í hverri þeirra. Þær þurfi einnig að vera byggðar á sameiginlegu trausti á þeim ferlum sem væru til staðar svo hægt væri að ná sem mestri sátt.

KÍO og FUMÍ þakka öllum þeim sem tóku þátt í fundinum.

F.v. Ingunn Gunnarsdóttir frá FUMÍ, Auður Önnu Magnúsdóttir framkvæmdastjóri Landverndar, Ketill Sigurjónsson framkvæmdastjóri Zepyr Iceland, Alma Stefánsdóttir hjá Landsvirkjun og Ungum umhverfissinnum, Halldór Þorgeirsson framkvæmdastjóri Loftslagsráðs, Aðalheiður Snæbjarnardóttir sjálfbærnistjóri Landsbankans, Sigrún Sayeh frá Ungum umhverfissinnum, Kristín Linda Árnadóttir aðstoðarforstjóri Landsvirkjunar og Lovísa Árnadóttir frá KÍO.

Félag umhverfisfræðinga á Íslandi (FUMÍ) og Konur í orkumálum (KÍO) boða til hádegisfundarins Orkumál eru umhverfismál: Sameiginleg markmið, samtal og samvinna.

Líkt og titillinn gefur til kynna er markmiðið að ræða um skörun málefna þessara tveggja félaga, orkumála og umhverfismála. Fjallað verður um þetta í stuttum erindum og pallborðsumræðum.

Boðið verður upp á hádegishressingu kl. 11.30 og fundurinn hefst svo kl. 12. Til að koma í veg fyrir matarsóun og gæta þess að sæti séu fyrir alla fundargesti er skráningar óskað.

Aðgangur er ókeypis. Verið öll hjartanlega velkomin!

Hildur Harðardóttir, formaður KíO, sagði á afmælismálþingi RARIK á dögunum gríðarleg tækifæri felast í því fyrir fyrirtæki í orkugeiranum að leggja áherslu á fjölbreyttan starfshóp.

Frá afmælismálþingi RARIK í Hofi á Akureyri. Mynd: RARIK

RARIK efndi til afmælismálþinga á fjórum stöðum á landinu í tilefni af 75 ára afmæli fyrirtækisins undir yfirskriftinni Rafmagnið í lífi okkar – hreyfiafl landsbyggðar til framtíðar og var Hildur þar á meðal framsögufólk.
Á málþingunum var fjallað um helstu áskoranir raforkukerfisins um þessar mundir, eins og til dæmis orkuskipti, loftlagsmál, afhendingaröryggi, verðskrár, jafnrétti kynja og sjálfbærni.
Í erindi Hildar kom fram að rannsóknir sýni að fjölbreytni í starfshóp fyrirtækja, bæði hvað varðar kyn og annan breytileika, skilar sér í aukinni nýsköpun, skilvirkari stjórnarháttum, sterkari fjárhag og betri ákvarðanatöku sem axlar ábyrgð á loftslagsvandanum. Fjárfesting í kynjafjölbreytileika er því fjárfesting í sjálfbærni sem nær út fyrir fyrirtækin sjálf og til samfélagsins.

Hér má sjá erindi Hildar.

Hildur var ekki ein úr stjórn KíO sem fluttu erindi á málþingunum. Silja Rán Steinberg Sigurðardóttir þróunarstjóri nýsköpunar og greininga hjá RARIK situr í stjórn KíO og fjallaði um uppbyggingu verðskrár og hvernig hún verði að endurspegla kostnað við flutning raforku.

Aðrir sem fluttu erindi á málþingunum voru Helga Jóhannsdóttir framkvæmdastjóri rekstrarsviðs RARIK og Kjartan Rolf Árnason deildarstjóri kerfisstýringar RARIK ásamt ávörpum frá forstjóra RARIK, Magnúsi Þór Ásmundssyni, og ráðstefnustjóranum og rithöfundinum Bergi Ebba Benediktssyni. Nánar um málþing RARIK og hlekkir á erindin má sjá á heimasíðu fyrirtækisins.

Silja Rán flytur erindi sitt.

Konur í orkumálum þakka RARIK fyrir að fá að taka þátt í þessum glæsilega afmælisáfanga og fyrir tækifærið að fá að segja frá félaginu vítt og breitt um landið ásamt því að minna á mikilvægi þess að vinna saman að jafnrétti í orkumálum.

Sumarganga Kvenna í orkumálum fór að þessu sinni fram á hinu undurfagra Hengilssvæði síðastliðinn fimmtudag. Birna Bragadóttir forstöðukona Elliðaárstöðvar og stjórnarkona KíO skipulagði gönguna og leiðsagði ásamt samstarfskonum hjá OR-samstæðunni. Gengið var að Bræðrabunu þar sem orkukonur gæddu sér á nestispakka og nutu góðrar samveru og náttúrufegurðar. Jarðsaga svæðisins er merkileg og því vel við hæfi að fá fróðleiksmola um svæðið frá Írisi Evu Einarsdóttur jarðfræðingi hjá OR.

Veðrið var milt og fallegt með smá rigningarskúr í lokin sem kom ekki að sök því boðið var upp á dýrindis heitt súkkulaði og Stroh eftir velheppnaða göngu.

Konur í orkumálum þakka félagsfólki fyrir frábæra samveru og hlökkum til komandi starfsárs!

Sumarganga Kvenna í orkumálum fer fram á hinu stórbrotna Hengilssvæði sem er rétt utan athafnasvæða Hellisheiðavirkjana Orku náttúrunnar.

Vinsamlega skráið þátttöku hér:
https://forms.gle/DaFGPLY8JzcoBa6D7

Hittumst við Jarðhitasýninguna fimmtudaginn 18. ágúst kl. 17:00. Gangan sjálf tekur um 1,5 tíma. Boðið verður upp á nestispakka og að göngu lokinni heitt kakó. Mikilvægt er að klæða sig eftir veðri og vera í gönguskóm og hafa regnjakka, húfu og vettlinga með í för. Þau sem vilja grípa með sér göngustafi.

Við hvetjum ykkur til að spara kolefnissporið og sameinast í bíla.
Það tekur um 30 mínútur að keyra miðsvæðis Reykjavíkur á Hellisheiðina.
Starfskonur ON og OR munu leiða gönguna og fræða okkur um svæðið, orkunýtinguna og landgræðsluna.

Hengilssvæðið er staðsett á virku gosbelti og býður upp á flest það sem prýðir íslenska náttúru: hvera- og gígasvæði, fjölbreytt gróðurfar, ár, stöðuvötn og áhugavert landslag.
Hengilssvæðið er vinsælt útivistarsvæði og eru um 110 km af merktum gönguleiðum á svæðinu sem OR og ON hefur haft veg og vanda í samstarfi við sveitastjórnir að leggja og viðhalda.

Frá vinstri: Harpa Pétursdóttir fráfarandi formaður, Hildur Harðardóttir nýr formaður, Dagný Ósk Ragnarsdóttir ný stjórnarkonar, Lovísa Árnadóttir stjórnarkona, Svandís Hlín Karlsdóttir stjórnarkona, Amel Barich ný varakona í stjórn, Silja Rán Steinberg Sigurðardóttir ný stjórnarkona og Ásgerður K. Sigurðardóttir ný stjórnarkona. Á myndina vantar Birnu Bragadóttur nýja stjórnarkonu og Ásdísi Benediktsdóttur varakonu í stjórn.

Ný stjórn var kjörin á aðalfundi Kvenna í orkumálum þann 5. maí sl. Hildur Harðardóttir, verkefnisstjóri á sviði Samfélags og umhverfis hjá Landsvirkjun, var kjörin formaður og tekur Hildur við af Hörpu Pétursdóttur, stofnanda félagsins og formanni frá árinu 2016.

Lovísa Árnadóttir hjá Samorku og Svandís Hlín Karlsdóttir hjá Landsneti voru endurkjörnar í stjórn til næstu tveggja ára. Sex nýjar stjórnarkonur taka sæti, þær Ásgerður K. Sigurðardóttir hjá Landsvirkjun, Birna Bragadóttir hjá Orkuveitunni, Dagný Ósk Ragnarsdóttir hjá Landsvirkjun og Silja Rán Steinberg Sigurðardóttir hjá RARIK. Varamenn eru Amel Barich hjá GEORG og Ásdís Benediktsdóttir hjá ÍSOR.

Konur í orkumálum er félag þeirra sem starfa í orku- og veitugeiranum á Íslandi eða hafa áhuga á honum. Félagið er opið öllum sem telja tilgang félagsins sig varða og vilja stuðla að framgangi félagsins. ​Aðildin er öllum opin enda eru það hagsmunir allra að jafna hlutfall kynjanna í geiranum.​​​

​Í dag kemur út skýrsla Kvenna í orkumálum um stöðu kvenna í orkugeiranum en skýrslan er unnin af Ernst&Young fyrir félagið. Þetta er önnur skýrslan sem Konur í orkumálum gefa út sem fjallar um stöðu kvenna innan íslenska orkugeirans. Fengnar voru upplýsingar um helstu ákvörðunar- og áhrifavaldastöður stærstu orkufyrirtækja landsins.

Niðurstöður skýrslunnar sýna margar hverjar jákvæða þróun í kynjahlutfalli fyrirtækjanna, en staðfesta þó að enn er langt í land. Niðurstöður sýna t.a.m. jafnt kynjahlutfall í stjórnum stærstu fyrirtækjanna sem og meðal stjórnarformanna. Skýrslan sýnir einnig fjölgun kvenkyns framkvæmdar- og deildarstjóra en hægan vöxt á fjölda kvenkyns forstjóra. Þá sýna niðurstöður einnig að Ísland er framarlega í samanburði við önnur lönd.

Með þessum tveimur skýrslum hefur verið lagður grunnur til þess að fylgjast með þróun kynjaskiptingar ákvörðunar- og áhrifavalds innan orkugeirans næstu árin.

Hér má nálgast skýrsluna.

Félagið Konur í orkumálum gefur út skýrslu um stöðu kvenna í orkugeiranum á Íslandi á tveggja ára fresti. Skýrslan, sem unnin er af EY, varpar ljósi á stöðu kvenna í orkugeiranum á Íslandi, sem löngum hefur verið karllægur.

Smelltu hér til að lesa skýrsluna
Smelltu hér til að lesa skýrsluna á ensku

Félagið Konur í orkumálum gefur út skýrslu um stöðu kvenna í orkugeiranum á Íslandi á tveggja ára fresti. Skýrslan, sem unnin er af EY, varpar ljósi á stöðu kvenna í orkugeiranum á Íslandi, sem löngum hefur verið karllægur.

Smelltu hér til að lesa skýrsluna
crossmenuarrow-down linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram